Deputetë dhe anëtarë të Aleancës për Ardhmërinë e Kosovës (AAK) zhvilluan këtë të diel një aksion simbolik para ndërtesës së Qeverisë së Kosovës, ku vendosën disa thasë me qymyr në hyrje të institucionit.
Aksioni u zhvillua në shenjë proteste ndaj bllokadës institucionale dhe politikave të qeverisë në detyrë të kryeministrit Albin Kurti në sektorin e energjisë.
Pjesëmarrësit vendosën gjithashtu një pankartë me mbishkrimin: “Kurti dhe LVV, nga terri energjetik, në terrin politik”.
AAK kritikoi faktin që, sipas saj, Kosova vazhdon të blejë energji elektrike nga Serbia dhe vende të tjera, pavarësisht rezervave të mëdha të qymyrit që ka vendi.
Deputeti i AAK-së, Burim Ramadani, deklaroi se qymyri i vendosur para Qeverisë simbolizon potencialin energjetik të Kosovës, i cili, sipas tij, nuk po shfrytëzohet.
“Mesazhi dhe simbolika e qymyrit të Kosovës është se Kosova edhe më tutje po fle mbi qymyr, por rryma nuk prodhohet këtu”, deklaroi Ramadani.
Ai tha se një prej pikave kryesore të ofertës gjashtëpikëshe të AAK-së është ndërtimi i një termocentrali të ri në Kosovë. Ramadani pretendoi gjithashtu se gjatë viteve të fundit janë shpenzuar rreth 1 miliard euro për blerjen e energjisë elektrike nga Serbia dhe vende të tjera.
Përfaqësuesi i AAK-së ngriti gjithashtu shqetësimin për kushtet dhe sigurinë e punëtorëve që punojnë në nxjerrjen e qymyrit, duke kërkuar përgjegjësi politike dhe menaxheriale për rastet kur punëtorët humbin jetën.
Aksioni vjen në një periudhë tensionesh politike dhe bllokade institucionale në Kosovë. Ndërkohë, javën e kaluar Kosova nënshkroi një marrëveshje për shitjen e qymyrit në Maqedoninë e Veriut, një veprim që është kritikuar nga partitë ish-opozitare.
