NATO ka deklaruar se ndryshimi gradual i pranisë së përhershme të KFOR-it në urën kryesore mbi lumin Ibër në Mitrovicë do të bazohet në zhvillimet e sigurisë dhe mund të rikthehet nëse situata e kërkon.
Aleanca thekson se çdo vendim për hapjen e urës për qarkullimin e automjeteve duhet të marrë parasysh nevojat e të gjitha komuniteteve lokale. Sipas NATO-s, riorganizimi i pranisë së KFOR-it është pjesë e optimizimit të misionit dhe po zhvillohet në përputhje me përmirësimin e situatës së sigurisë në Kosovë.
NATO ka konfirmuar gjithashtu se sekretari i përgjithshëm Mark Rutte është në kontakt të rregullt me presidentin serb Aleksandar Vuçiç.
KFOR-i vijon të monitorojë situatën në terren dhe, pavarësisht ndryshimeve në pozicionim, NATO thekson se mban një prani të fuqishme dhe të dukshme në veri të Kosovës, përfshirë zonat ku jeton komuniteti serb. Aleanca sqaroi se KFOR-i nuk ka mandat për zbatimin e ligjit, por bashkëpunon ngushtë me Policinë e Kosovës dhe institucionet e tjera të sigurisë.
