Shëngjin – Pesë nga 49 emigrantët që mbërritën të martën në mëngjes me anijen “Casiopea” në portin e Shëngjinit do të kthehen në Itali, pasi pas verifikimeve rezultuan minorenë ose me probleme shëndetësore.
Ndërkohë, 44 emigrantët e tjerë janë dërguar në kampin e Gjadrit, ku do të presin vendimin e Gjykatës së Romës mbi vlefshmërinë e mbajtjes së tyre në Shqipëri. Vendimi pritet brenda 48 orëve, pas së cilës do të shqyrtohet edhe kërkesa e tyre për azil.
Shumica e emigrantëve janë nga Bangladeshi, ndërsa të tjerët vijnë nga Egjipti, Bregu i Fildishtë dhe Gambia. Ky është grupi i tretë dhe më i madh i azilkërkuesve të sjellë në Shqipëri, pas dy valëve të para në tetor dhe nëntor të vitit të kaluar.
Më herët, gjykatat italiane kishin bllokuar disa herë transferimin e emigrantëve në Shqipëri, duke kundërshtuar një listë unike të vendeve të origjinës së azilkërkuesve për të gjitha shtetet e BE-së, siç pretendonte qeveria italiane.
