Pak ditë më parë, kur Durrësi u përmbyt në disa nga lagjet e tij, ujërat vërshuan edhe në burgun e qytetit bregdetar, ku mbahen të izoluar persona të rëndësishëm të politikës, kryesisht të dënuar për korrupsion.
Sipas burimeve, kati i parë i burgut u përmbyt, duke detyruar Drejtorinë e Përgjithshme të vepronte me urgjencë. Një pjesë e të paraburgosurve u transferuan përkohësisht, ndërsa të tjerët u vendosën në qelitë e katit të dytë. Për disa orë, situata ishte kaotike.
Pas rënies së nivelit të ujit, nisi puna për sistemimin e të paraburgosurve dhe vlerësimin e dëmeve. Burgu i Durrësit strehon kryesisht zyrtarë të akuzuar për korrupsion. Aktualisht, mes tyre ndodhet ish-ministri i Shëndetësisë, Ilir Beqaj. Më herët, në këtë burg kanë qëndruar edhe Fredi Beleri, ish-ministri i Mjedisit Lefter Koka dhe ish-kryebashkiaku Vangjush Dako.
