Pas valës së protestave kundër rritjes së çmimeve në rajon, edhe në Kosovë po shqyrtohet mundësia e bojkotit të marketeve të mëdha si një formë reagimi ndaj abuzimeve me çmimet. Përfaqësuesit e konsumatorëve kërkojnë ndërhyrje urgjente, ndërsa qytetarët ankohen për pagat e ulëta dhe shpenzimet e larta që po rëndojnë ekonomitë familjare.
Qytetarët thonë se fuqia blerëse ka rënë ndjeshëm dhe se produktet bazë janë bërë gjithnjë e më të shtrenjta.
Bojkoti si formë presioni nisi në Kroaci, ku qytetarët refuzuan të blejnë në supermarketet kryesore. Pas një jave, rrjeti më i madh i marketeve, Konzum, uli çmimet e 250 produkteve, ndërsa qeveria vendosi kufizime të reja për 70 produkte të tjera.
Frymëzuar nga ky sukses, bojkoti u përhap edhe në Serbi, Maqedoninë e Veriut, Mal të Zi, Bosnje dhe Slloveni. Qytetarët atje po shmangin blerjen e produkteve specifike ose ndalojnë tërësisht konsumin për një ditë të tërë.
Vetëm në Shqipëri nuk ka ende një inisiativë qytetare për këtë problematikë. Pak ditë më parë në rrjetet sociale qarkulloi një poster që i bënte thirrje konsumatorëve të bojkotonin rrjetet e supermarketeve, por kjo mbeti thjesht një inisiativë online.
