Gjykata e Shkallës së Parë të Jurisdiksionit të Përgjithshëm Berat ka caktuar këtë të enjte masën e sigurisë “arrest me burg” për Zamir Skënderin, autorin e dyshuar të plagosjes me armë zjarri të efektivit të policisë Arsen Toska, ngjarje e ndodhur mbrëmjen e 18 majit.
45-vjeçari, banues në Kuçovë, mbërriti në ambientet e Gjykatës së Beratit nën masa të rrepta sigurie, ndërsa seanca për caktimin e masës së sigurisë u zhvillua me dyer të mbyllura.
Prokurorja e çështjes, Marilda Frashëri, pasi paraqiti rrethanat e ngjarjes para gjykatës, kërkoi cilësimin të ligjshëm të arrestimit të Zamir Skënderit dhe caktimin ndaj tij të masës “arrest me burg”. Ai akuzohet për veprat penale “Vrasja me dashje e punonjësve të Policisë së Shtetit, gjatë detyrës ose për shkak të saj”, parashikuar nga neni 79/b i Kodit Penal, si dhe “Prodhimi dhe shitja e narkotikëve”, parashikuar nga neni 283/1 i Kodit Penal.
Nga ana tjetër, avokati mbrojtës i Skënderit argumentoi se ngjarja ka ndodhur në një gjendje të rënduar psikologjike të autorit, i cili sipas tij ishte nën efektin e lëndëve narkotike. Vetë 45-vjeçari ka shprehur pendesë për ngjarjen, duke deklaruar se nuk mban mend se çfarë ka ndodhur dhe si ka ndodhur.
Në përfundim, gjyqtarja Elkida Olldashi vendosi cilësimin të ligjshëm të arrestimit të Zamir Skënderit dhe caktimin ndaj tij të masës së sigurisë “arrest me burg”.
