Një autobus me studentë shqiptarë nga Shqipëria nuk është lejuar të kalojë kufirin në pikën doganore të Bllatës në Dibër, në kufi me Maqedoninë e Veriut, dy ditë më parë.
Sipas raportimeve, autobusi me studentë po udhëtonte drejt Shkupit për t’iu bashkuar protestës së organizuar nga studentët shqiptarë në Maqedoninë e Veriut. Pas ndalimit në kufi, studentët janë shoqëruar nga policia maqedonase drejt Kumanovës.
Të hënën, studentët shqiptarë në Maqedoninë e Veriut zhvilluan protestën e radhës, ku kërkesa kryesore ishte garantimi i të drejtës për zhvillimin e provimeve në gjuhën shqipe.
Kjo kërkesë buron nga studentët e Fakultetit të Drejtësisë, të cilët prej dy vitesh kërkojnë të japin provimet në gjuhën amtare, pa arritur ende të marrin një zgjidhje nga autoritetet përkatëse.
