Apeli i GJKKO ka vendosur të ndryshojë vendimin ndaj ish-sekretarit të përgjithshëm të Ministrisë së Mjedisit, Alqi Bllako, në kuadër të çështjes së inceneratorit të Tiranës.
Apeli ka shpallur të pafajshëm Bllakon për një nga episodet e akuzës për korrupsion, që lidhej me përfitimin e rreth 7 milionë lekëve në formë page nga Vladimir Bezhani.
Ndërkohë, gjykata ka lënë në fuqi dënimin për episodin tjetër të akuzës, i cili lidhet me përfitimin e parregullt në vlerën 119 mijë euro, të dyshuara si të marra nga pronarët e inceneratorëve Klodian Zoto dhe Mirel Mërtiri.
Si pasojë e këtij vendimi, Apeli ka ulur dënimin nga 4 vite burg (me gjykim të shkurtuar) në 2.8 vite, ndërsa pas aplikimit të lehtësimeve ligjore dënimi përfundimtar është reduktuar në 2 vite burg.
Sipas vendimit, Bllako ka vuajtur tashmë pjesën më të madhe të dënimit dhe pjesa e mbetur e tij do të kryhet në formën e shërbimit të provës.
