Debate të nxehta dhe braktisje të sallës kanë shoqëruar mbledhjen e fundit politike, ku kryeministri Edi Rama është përplasur me disa prej drejtuesve lokalë të majtë, bashkitë e të cilëve pritet të shkrihen.
Përplasja nisi pasi Arbjan Mazniku paraqiti arsyetimet se pse 15 njësi vendore do të shkrihen. Pas këtij prezantimi, kryetari i Bashkisë së Poliçanit, Adriatik Zotkaj, reagoi ashpër duke kërkuar sqarime se përse bashki si Peqini, Roskoveci apo Vau i Dejës nuk u përfshinë në këtë listë, ndonëse sipas tij kanë performancë më të dobët se Poliçani.
Zotkaj e cilësoi reformën territoriale të vitit 2014 si një dështim që shpopulloi fshatrat, duke paralajmëruar se ndryshimet e reja do të sjellin të njëjtin rezultat.
Kjo kritikë nxiti ndërhyrjen e menjëhershme të kryeministrit Rama, i cili iu drejtua me tone të ashpra kryebashkiakut të Poliçanit, duke i thënë se nuk duhej të ishte fare i pranishëm në mbledhje dhe se “me pafytyrësi po digjeshin edhe teserat e partisë”.
Adriatik Zotkaj iu përgjigj duke deklaruar se kishte ardhur me ftesë për të përfaqësuar komunitetin e tij dhe jo për qejf, ndërsa shtoi se “pafytyrësinë po e bëjnë ata që po marrin këto vendime”.
Tensioni në mbledhje u shkallëzua më tej kur kryeministri debatoi edhe me kryetaren e Bashkisë së Dimalit, Juliana Memaj.
Situata përfundoi me braktisjen e takimit. E para që u largua nga salla pas tensioneve ishte Juliana Memaj, e ndjekur menjëherë më pas nga kryebashkiaku i Poliçanit, Adriatik Zotkaj.
Takimi u zhvillua në Kuç të Vlorës, ndërsa ka zgjatur rreth katër orë e 30 minuta.
