Ish-kryeministri Sali Berisha, i cili ka dominuar në skenën opozitare për dekada, ishte sërish protagonist kryesor gjatë këtij viti. Berisha iu drejtua mbështetësve të tij nga ballkoni i selisë së PD-së, duke i ftuar në “revolucionin demokratik”.
SPAK intensifikoi hetimet ndaj tij, ndërsa kërkesa për arrest shtëpie dhe akuzat për korrupsion ndikuan në perceptimin publik. Përkrahësit e tij e panë këtë si një përpjekje të qeverisë për ta larguar nga skena politike, ndërsa kritikët e opozitës e përdorën këtë si një argument për nevojën e rinovimit të lidershipit në PD.
Për opozitën e vitit 2024, shumëkush mund të argumentonte se ky ka qenë një vit i përqendruar te një kauzë personale e liderit të saj, Sali Berisha, dhe jo një vit ku janë ofruar propozime dhe politika të qarta për qytetarët. Protestat, akuzat dhe kundërshtitë ndaj qeverisë, megjithëse të drejta në shumë raste, shpesh ishin të shpërqendruara nga nevojat urgjente të një opozite që ka humbur lidhjen me realitetin e qytetarëve të zakonshëm.
Opozita ka organizuar disa protesta masive gjatë vitit, por shpesh ato janë kritikuar për mungesën e një platforme të qartë politike që do të ofronte zgjidhje për shqetësimet e qytetarëve. Pjesa më e madhe e këtyre protestave ishin për Berishën dhe kundërshtimin e qeverisë, por pa një vëmendje të mjaftueshme ndaj çështjeve që prekin drejtpërdrejt jetën e qytetarëve, si rritja e çmimeve, papunësia dhe pasiguria ekonomike. Opozita shpesh e ka përmendur korrupsionin dhe kapjen e shtetit, por ka qenë e vështirë të identifikosh një alternative konkrete për këto sfida nga ana e opozitës. Në vend që të ftojnë qytetarët të bashkohen për një të ardhme më të mirë, shumë herë ato kanë shfrytëzuar protestat si mundësi për të mbajtur gjallë debatin për fitoren e Berishës mbi Ramën, duke e shndërruar luftën politike në një betejë personale.
Në vitin 2024, opozita shqiptare duket se ka bërë një zgjedhje të qartë: të jetë “zhurmuesi” i politikës, duke përdorur taktika që përfshinin bllokimin e rrugëve, djegien e karrigeve në Parlament, dhe refuzimin e pjesëmarrjes në seanca, për të krijuar një atmosferë tensioni dhe për të tërhequr vëmendjen.
A do të sjellë 2025 kthesën?
Opozita ka hyrë në një moment kritik, duke e konsideruar 2024-n si “vitin e fundit në opozitë”. Megjithatë, mbetet për t’u parë nëse aksioni politik dhe protestat e këtij viti do të arrijnë të bindin elektoratin për ndryshimin e pushtetit në zgjedhjet e ardhshme.
