Bisedimet për një armëpushim në Gaza po përballen me ngecje, për shkak të mospajtimeve midis Izraelit dhe Hamasit lidhur me shkallën e tërheqjes së forcave izraelite nga territori palestinez, sipas burimeve izraelite dhe palestineze të përfshira në negociatat në Doha.
Negociatat e ndërmjetësuara nga SHBA-të, që synojnë arritjen e një armëpushimi 60-ditor, kanë hyrë në javën e dytë. Presidenti amerikan Donald Trump është shprehur optimist për një përparim të shpejtë, duke iu referuar një propozimi të ri të mbështetur nga Uashingtoni.
Ndërkohë, në Gaza, situata humanitare vazhdon të përkeqësohet. Të shtunën, 17 persona që kërkonin ndihma ushqimore u vranë kur trupat izraelite hapën zjarr pranë një qendre shpërndarjeje ndihmash. OKB-ja raporton se operacione të tilla kanë shkaktuar rreth 800 viktima në gjashtë javët e fundit. Dëshmitarë thanë se disa nga të vrarët u qëlluan në kokë dhe në bust. Ushtria izraelite deklaroi se kishte përdorur të shtëna paralajmëruese dhe se nuk kishte gjetur prova se viktimat ishin qëlluar nga trupat e saj.
Delegacionet nga Izraeli dhe Hamasi ndodhen në Katar për të arritur një marrëveshje që përfshin lirimin gradual të pengjeve, tërheqjen e trupave izraelite dhe fillimin e negociatave për përfundimin e konfliktit.
