Protesta Kombëtare që nisi më 31 maj kundër qeverisë, klasës politike dhe politikave që, sipas organizatorëve, dëmtojnë interesat kombëtare, shënon sot ditën e saj të 40-të. Me këtë rast, një grup aktivistësh pjesë e lëvizjes që nga dita e parë ka njoftuar nisjen e procesit për krijimin e një Kuvendi Kombëtar Qytetar, i cili synon të shërbejë si organ përfaqësues i protestës.
Në deklaratën publike thuhet se protesta ka hyrë në një fazë të re dhe se, krahas vazhdimit të mobilizimit në shesh, nevojitet një strukturë e përhershme organizimi dhe përfaqësimi që të udhëheqë kauzën qytetare. Sipas grupit të punës, Kuvendi do të zgjidhet nga vetë pjesëmarrësit në protestë dhe çdo vendim i tij do të duhet të miratohet nga qytetarët në mënyrë transparente dhe të verifikueshme.
Aktivistët theksojnë se protesta ka nisur kundër, sipas tyre, “shitjes së pasurive kombëtare”, largimit të shqiptarëve, korrupsionit dhe bashkëpunimit politik mes Edi Ramës dhe Sali Berishës, duke kërkuar demokraci, shtet të së drejtës, ekonomi të lirë dhe mbrojtjen e integritetit territorial të vendit.
Në thirrjen drejtuar qytetarëve, grupi i punës fton çdo protestues që ndan këto parime t’i bashkohet procesit të krijimit të Kuvendit Kombëtar Qytetar, duke theksuar se përfaqësimi do t’i përkasë vetëm protestës dhe se asnjë vendim nuk do të merret jashtë vullnetit të pjesëmarrësve në të.
