Partia Socialiste dhe Partia Demokratike nuk kanë arritur të gjejnë gjuhën e përbashkët në Strasburg për miratimin e deklaratës së përbashkët të Komitetit të Stabilizim-Asociimit mes Shqipërisë dhe Parlamentit Europian.
Dokumenti, i cili miratohet në përfundim të takimeve periodike mes përfaqësuesve të Shqipërisë dhe Bashkimit Europian, përmban vlerësime mbi progresin e vendit drejt integrimit europian, si dhe rekomandime për reformat që duhet të ndërmerren. Megjithatë, këtë herë deklarata nuk mori miratimin, pasi votimi në delegacionin shqiptar përfundoi me rezultat të barabartë, 7 vota pro dhe 7 kundër.
Përfaqësuesit e Partisë Demokratike deklaruan se mazhoranca ka refuzuar amendamentet e propozuara prej tyre, të cilat sipas opozitës lidhen me luftën kundër korrupsionit, zbatimin e vendimeve të gjykatave, veçanërisht atyre të Gjykatës Kushtetuese, si dhe forcimin e transparencës dhe mekanizmave të kontrollit.
“Propozimet tona synonin forcimin e shtetit të së drejtës dhe standardeve që Bashkimi Europian i konsideron të domosdoshme për përparimin e procesit të integrimit”, u shpreh Partia Demokratike.
Nga ana tjetër, Partia Socialiste pretendon se ka pranuar një pjesë të amendamenteve të opozitës, por ka kundërshtuar ato që, sipas saj, cenonin balancën e dokumentit dhe nuk pasqyronin progresin e Shqipërisë të evidentuar në raportet e Komisionit Europian.
Sipas socialistëve, deputetët demokratë “votuan kundër Shqipërisë në procesin europian”, duke mos mbështetur një dokument të përbashkët parlamentar.
Procedura e miratimit të deklaratës së KSA-së kërkon një shumicë të dyfishtë: mbështetjen e shumicës së delegacionit shqiptar, i përbërë nga 14 deputetë (7 socialistë dhe 7 demokratë), si dhe shumicën e delegacionit të Parlamentit Europian, me 14 eurodeputetë.
Për shkak të mungesës së konsensusit në delegacionin shqiptar dhe mungesës së shumicës së nevojshme edhe në delegacionin europian, deklarata e përbashkët nuk u miratua. Në votimin e eurodeputetëve, dokumenti mori vetëm 5 vota pro.
Ndërkohë, gjatë diskutimeve në Parlamentin Europian u trajtua edhe çështja e projektit të Zvërnecit. Kreu i Grupit Parlamentar të Partisë Socialiste, Taulant Balla, deklaroi se Shqipëria do të respektojë standardet europiane për mbrojtjen e mjedisit, ndërsa deputeti demokrat Gazment Bardhi ngriti shqetësime për rolin dhe hapësirat e opozitës në parlament.
