Në një kohë kur festat fetare shpesh janë kthyer në parada urimesh protokollare dhe fotografish politike, Myftinia Shkodër ka zgjedhur një rrugë tjetër për Kurban Bajramin e këtij viti: të mos organizojë pritje për politikanët dhe drejtuesit vendorë.
Në vend të vizitave zyrtare, ceremonive formale dhe radhëve të urimeve politike, Myftinia ka vendosur që dita e festës t’u kushtohet fëmijëve, duke organizuar një aktivitet festiv në oborrin e xhamisë së Parrucës.
Në njoftimin zyrtar thuhet qartë se “për shkak të Festës së Fëmijëve nuk do të ketë pritje të vizitave”.
Vendimi vjen si një mesazh jo i vogël në një realitet ku politika shqiptare prej vitesh i përdor festat fetare si skena publike për prezencë, kamera dhe konsum politik, shpesh duke e zhvendosur vëmendjen nga vetë kuptimi shpirtëror i festës.
Në vend të kortezheve zyrtare dhe buzëqeshjeve protokollare, Myftinia Shkodër ka zgjedhur simbolikisht t’i japë përparësi fëmijëve dhe atmosferës së besimit, duke lënë jashtë një ritual që për shumë njerëz është kthyer prej kohësh në një nga shemtitë më të mëdha të marrëdhënies mes politikës dhe fesë.
