Kanë kaluar 6 muaj nga zhdukja misterioze e një shtetasi gjerman në ujrat shqiptare, por ende nuk ka asnjë gjurmë të tij.
Fellmann Frank Rudigeri ishte duke udhëtuar me velierë nga Bari i Italisë me drejtim Kroacinë ndërsa anija me vela u gjet në ujrat shqiptare më 10 Shtator të vitit 2024.
Policia konfirmoi për Euronews Albania se janë kryer kërkime në hapësirën detare dhe vijën bregdetare, por nga kontrollimet e ushtruara nuk ka patur rezultate për gjetjen e trupit të Fellmann Frank Rudiger.
Nga hetimet, dyshohet se 85-vjeçari ka qenë i vetëm në lundrim. Veliera vijon të qëndrojë në Karpen që prej muajit shtator të vitit të kaluar, tashmë e sekuestruar si provë materiale dhe nën ruajtje 24 orë nga shërbimet e Policisë.
Pista kryesore për hetuesit mbetet rënia aksidentale në det për shkak të motit të keq.
Autoritetet tona kanë komunikuar me oficerin e kontaktit në Gjermani, i cili konfirmoi se i biri i 85-vjeçarit kishte humbur kontaktet me babain dhe pohonte se nuk kishte probleme apo konflikte me askënd.
Fellmann Frank Rudiger kishte nisur me velierën nga Bari i Italisë më 9 shtator të vitit të kaluar, në drejtim të Kroacisë.
Një ditë më pas, shërbimet e Policisë Kufitare, gjatë monitorimit të zonës bregdetare, kanë konstatuar një mjet lundrues (velierë) që bënte lëvizje të pakontrolluara, i cili më pas ka ngecur në rërë disa metra larg bregut, në territorin e fshatit Karpen.
Gjatë kontrollit në velierë u gjetën pasaporta gjermane e 85-vjeçarit, një armë zjarri pistoletë me leje, një krehër pistoletë, municion luftarak, dy celularë, një laptop dhe dokumentet e mjetit lundrues. /Euronews Albania
