Ditën e djeshme, në media u raportua se grupi i Demokratëve Euroatlantikë, i drejtuar nga Lulzim Basha, është regjistruar si parti e veçantë për të marrë pjesë në zgjedhjet e 11 majit. Duket se ky është një vendim i nxitur nga fakti se ai që njihet si grupim i Lulzim Bashës është në pritje të vendimit të Gjykatës së Lartë për çështjen e vulës dhe simboleve të PD.
Por, pavarësisht apelimit në Gjykatën e Lartë, çështja e vulës ende nuk ka një datë për shqyrtim. Kreu i grupimit, Lulzim Basha, ka përsëritur vazhdimisht thirrjet për një shqyrtim sa më të shpejtë nga ana e Gjykatës së Lartë, ndërsa ka siguruar që në çdo rrethanë Demokratët Euroatlantikë do të marrin pjesë në zgjedhje.
Duke qenë se ka vetëm tre muaj para zgjedhjeve dhe me çështjen e vulës ende pa një datë në Gjykatën e Lartë, grupimi i drejtuar nga Basha ka vijuar me planin për t’u regjistruar si subjekt zgjedhor. Ky hap është një garanci për të qenë alternativë për qytetarët më 11 maj.
