Sot, qytetarët e Kosovës i janë drejtuar kutive të votimit për të zgjedhur përfaqësuesit e rinj në Kuvendin e Kosovës. Rreth 2 milionë votues me të drejtë vote pritet të vendosin për përbërjen e re të parlamentit, që do të përbëhet nga 120 ligjvënës të zgjedhur mes 28 subjekteve politike. Këto janë zgjedhjet e nënta parlamentare që nga përfundimi i luftës së viteve 1998-1999.
Gjatë fushatës elektorale, partitë politike kanë shpalosur premtime të shumta, duke u fokusuar në rritjen e pagave dhe pensioneve, përmirësimin e sistemit arsimor dhe atij shëndetësor, si dhe në luftën kundër varfërisë.
Rezultatet e këtyre zgjedhjeve priten të jenë vendimtare për drejtimin e ardhshëm të vendit, sidomos në lidhje me dialogun e ngecur për normalizimin e marrëdhënieve me Serbinë. Shtetet e Bashkuara dhe Bashkimi Evropian kanë bërë thirrje që të dyja palët të zbatojnë marrëveshjen e arritur gati dy vjet më parë, që parashikon krijimin e Asociacionit të Komunave me shumicë serbe dhe njohjen ‘de facto’ të pavarësisë së Kosovës nga ana e Beogradit.
Procesi zgjedhor po monitorohet nga vëzhgues vendas dhe ndërkombëtarë, për të garantuar një proces të drejtë dhe demokratik.
