Aleksandër Laho alias Pëllumb Muharremi, i njohur me nofkën Rrumi, u dënua me 3 vite burgim për akuzën e “korrupsionit aktiv të personave që ushtrojnë funksione publike”, e kryer në bashkëpunim. Për shkak të gjykimit të shkurtuar, dënimi iu reduktua në 2 vite. Verdikti për të u firmos nga Gjykata e Posaçme e Apelit, e cila, ndryshe nga Gjykata e Posaçme, e ashpërsoi edhe më shumë masën e dënimit për Rrumin. Aleksandër Laho ndërkohë ndodhet ende në arrati dhe gjykimi është bërë në mungesë të tij.
Nga hetimet e SPAK rezultoi se Laho i ka dhënë zyrtarit të Avokaturës së Shtetit, Irgen Kërçuku, shumën 600 mijë lekë dhe i ka premtuar edhe 300 mijë lekë më shumë, me qëllim që të mos ushtronte ankim për një çështje. Prokuroria thotë se paratë janë dhënë si ryshfet për mosankimin në Apel të vendimit që lidhej me tjetërsimin e 45 mijë metrave katrorë tokë publike në Gjirin e Lalzit.
Aleksandër Laho i mbijetoi një atentati te mbikalimi i Shkozetit më 1 nëntor 2019, teksa ndodhej duke udhëtuar me makinën e ish-prokurorit të Durrësit, Arjan Ndoj. Rrumi dhe Ndoj mbetën të plagosur, ndërsa u vra shoferi Andi Maloku. Për atentatin po gjykohet Plarent Dervishaj dhe anëtarë të grupit të tij. Ndërsa si ekzekutor është dënuar me burgim të përjetshëm Redian Rraja, nipi i ish-deputetit socialist Rrahman Rraja. Nga celularët e sekuestruar në këtë ngjarje u zbulua edhe rasti i korrupsionit për të cilin Rrumi u dënua me 2 vjet, përfundimisht me vendim të formës së prerë.
