Gjykata e Tiranës ka vendosur të lirojë nga qelia Edison Haxhiun, i cili ishte nën hetim për përfshirjen në vrasjen e Gentian Bejtjas në mars të vitit 2023 në Fushë-Krujë. Vendimi u mor pas pranimit të kërkesës së avokatit mbrojtës Sokol Tahiraj, i cili argumentoi se ishin tejkaluar afatet ligjore të paraburgimit dhe kërkoi shuarjen e masës së sigurisë.
Sipas Prokurorisë së Tiranës, Haxhiu dyshohet se ka bashkëpunuar me Ilir Beqarajn në atentatin ndaj Bejtjas. Ky i fundit është dërguar për gjykim si bashkëautor, me rolin e ndihmësit në ekzekutimin që ndodhi në banesën e viktimës.
Gentian Bejtja, një emër i njohur për autoritetet për shkak të përfshirjes së tij të dyshuar në disa ngjarje kriminale, u vra më 15 mars 2023. Më herët, në janar të vitit 2022, ai kishte shpëtuar nga një tjetër atentat në afërsi të Niklës, ku mbeti i plagosur miku i tij, Klodian Stafuka.
