Ministrja e Shtetit për Marrëdhëniet me Parlamentin, Elisa Spiropali, në fjalën e saj në Kongresin e PS teksa foli me mjaft patos sesi Partia Socialiste edhe pse pas tre mandatesh në qeverisje, sipas saj, ka qenë opozita më serioze dhe më e ashpër e vetvetes.
Duke rikthyer tek thembra e Akilit, sistemi i drejtësisë, Spiropali pohoi se kushdo gjendet para dyerve të SPAK, betëjen e ka personale dhe duhet të përballet.
“Ne kemi rikthyer në jetë pushtetin e drejtësise. Ka një listë jo të vogël me miq, kolegë dhe ish-kolegë që fatkeqësisht kanë një bast personal me drejtësinë. Është shumë e rendë nga pikëpamja njerëzore, por e pashmangshme që beteja e tyre të jetë individuale. Jam shumë e ndërgjegjshme që ka më shumë përceptim sesa të vërtetë në shkallën e idesë së korrupsionit në nivele të ndryshme të qeverisjes. Di që nuk ka asnjë të vërtetë në pohimin cinik që thotë se: “gjithë klasa politike është njëlloj dhe njëlloj në grishjet materialiste dhe në futjen e dorës në fondet publike”.
Këtë gjë e ndan drejtësia dhe ne thjesht duhet të presim. Kush ka gabuar me dashje, duhet të paguajë dhe kush vërteton përpara drejtësisë të kundërtën, e ka të hapur derën e mbyllur përkohësisht. Askush nuk mund të linçohet, të denigrohet apo t’i dënohet e drejta në emër të gjyqeve popullore. Ndaj, prezumimi i pafajësisë është i shenjtë, ndaj besimi ynë nuk është ndëshkimi me çdo kusht dhe me çdo çmim por tek drejtësia deri në fund. Ne duhet të kuptojmë se zgjidhjet juridike janë të pamjaftueshme nëse ne nuk parashoqërohen nga zgjidhje me mjete politike. Mirëqeverisje, antikorrupsion, sundimi i ligjit janë prioritete kombëtare jo vetëm emërtesa të një komisoni të posaçem, tek i cili kam besim të plotë se do jetë një risi dhe sukses publik”.
