Katedralja “Notre-Dame” do të rihapë dyert e saj më 7 dhe 8 dhjetor, për të pritur vizitorë nga e gjithë bota, jo vetëm nga Franca. Kjo rihapje pas rreth pesë vitesh vjen pas një fatkeqësie kur në vitin 2019 katedralja u përfshi nga një zjarr masiv, i cili dyshohet të ketë qenë aksidental.
Ceremonia e rihapjes do të zhvillohet më 7 dhe 8 dhjetor, dhe do të jetë kryesisht me ftesa, megjithatë ngjarja do të transmetohet në televizion, duke u mundësuar të gjithë të ndjekin momentet historike, ndërkohë që vizitorët mund të mblidhen përpara katedrales.
Presidenti i Francës, Emmanuel Macron, e mbajti premtimin e tij për të restauruar këtë simbol të kulturës franceze brenda pesë vjetëve, një angazhim që asokohe dukej i vështirë për t’u realizuar, për shkak të dëmeve të mëdha që shkaktoi zjarri.
Djegia e saj ndodhi më 15 prill 2019, kur "Notre-Dame" u mbulua nga flakët, ndërsa rreth 600 zjarrfikës luftuan për më shumë se 15 orë për të shuar zjarrin. Pas këtij incidenti, janë mbledhur rreth 840 milionë euro nga donatorë nga e gjithë bota për restaurimin e katedrales. Para zjarrit, “Notre-Dame” priste rreth dymbëdhjetë milionë vizitorë çdo vit.
