Një sulm i rëndë me raketë balistike nga Irani ka goditur një nga spitalet më të mëdha në jug të Izraelit, duke shkaktuar reagime të ashpra nga autoritetet izraelite. Zëvendësministrja e Jashtme e Izraelit, Sharren Haskel, e ka cilësuar këtë veprim si “të qëllimshëm” dhe “kriminal”, duke theksuar se ishte një sulm ndaj një objekti civil dhe jo një targeti ushtarak.
“Irani sapo goditi Spitalin Soroka në Be’er Sheva me një raketë balistike. Jo një bazë ushtarake. Një spital. Ky është qendra kryesore mjekësore për gjithë rajonin e Negevit në Izrael. E qëllimshme. Kriminale. Një objektiv civil. Bota duhet të reagojë,” shkroi Haskel në një postim në platformën X (ish-Twitter).
Spitali Soroka, i ndodhur në qytetin Be’er Sheva, shërben si një nga pikat kyçe të kujdesit shëndetësor për qindra mijëra banorë të Negevit dhe është një institucion referimi për mjekësi urgjente dhe trajtime të specializuara në jug të vendit.
Ndërkohë, ky sulm shënon përshkallëzimin më të fundit të tensioneve mes Izraelit dhe Iranit, në një kohë kur rajoni ndodhet në një klimë të lartë pasigurie dhe përplasjesh të shpeshta.
Autoritetet izraelite nuk kanë dhënë ende informacion zyrtar për dëmet ose viktimat e mundshme të shkaktuara nga goditja në spital. Megjithatë, mesazhi i Haskel është një thirrje e drejtpërdrejtë ndaj komunitetit ndërkombëtar për të dënuar sulmin dhe për të ndërmarrë masa konkrete ndaj regjimit iranian.
