Kreu i SPAK, Altin Dumani, ka konfirmuar se grupet kriminale shqiptare janë të pranishme në disa shtete të Amerikës Latine, veçanërisht në Ekuador. Gjatë një deklarate në Komisionin e Monitorimit të Asamblesë Parlamentare të Këshillit të Europës, Dumani theksoi se SPAK ka një bashkëpunim të ngushtë me autoritetet ekuadoriane.
"Sa i përket Ekuadorit, hetimet tona kanë vërtetuar praninë e grupeve kriminale shqiptare në këtë vend. Kemi një marrëdhënie të fortë bashkëpunimi me autoritetet e Ekuadorit, dhe vetëm në vitin 2024 kemi konsoliduar më tej këtë partneritet," - tha Dumani.
Ai shtoi se SPAK ka ndihmuar autoritetet ekuadoriane në hetimet që ata po kryejnë ndaj grupeve kriminale shqiptare, ndërsa bashkëpunimi i dyanshëm po vazhdon për të luftuar krimin e organizuar.
"Padyshim, bashkëpunimi me Ekuadorin dhe shtetet e tjera të Amerikës Latine është një sfidë, por ne si SPAK kemi arritur të krijojmë kontakte, të shkëmbejmë informacion dhe të ndërtojmë hetime të përbashkëta kundër grupeve kriminale shqiptare. Kjo ka ndodhur edhe me shtete të tjera të Amerikës Latine, si Brazili, Argjentina dhe Kolumbia, ku krimi i organizuar shqiptar është i pranishëm," - përfundoi Dumani.
