Gjykata e Posaçme rrëzoi kërkesën e Evis Berberit, ish-kreut të Autoritetit Rrugor Shqiptar, për zëvendësim të masës së sigurisë. Ish-zyrtari dhe njeriu më i besuar i Belinda Ballukut, telefonat e të cilit “fundosën” ish-zv.kryeministren, kishte vendosur edhe garanci pasurore, me qëllim që të linte qelitë e paraburgimit, por çdo kërkesë e tij u rrëzua.
Evis Berberi u arrestua që në vitin 2024 për akuzat e korrupsionit dhe pastrimit të parave, përderisa sipas SPAK kontrollonte kompaninë DAMM shpk në mënyrë të tërthortë, të cilën e furnizonte me tendera publikë. Nga këqyrja e telefonave celularë që iu sekuestruan gjatë arrestimit u zbuluan të dhënat që çuan nën akuzë ish-eproren e tij, Ballukun.
Berberi është po ashtu i pandehur bashkë me Ballukun për paracaktim të tenderit për ndërtimin e tunelit të Llogarasë. Të pandehur për këtë çështje janë edhe Erald Elezi, ish-administrator i KESH, dhe Gentian Gjyli, ish-kreu i ARRSH-së, si dhe disa zyrtarë të tjerë. Balluku po hetohet për abuzime me tenderat e rrugëve dhe ndaj saj janë në fuqi dy masa sigurie.
