“Vrasës me pagesë” është mesazhi që protestuesit kanë shkruar në asfalt, në Rrugën e Durrësit në Tiranë, në ditën e 13-të të protestave kundër qeverisë së kryeministrit Edi Rama.
Mbishkrimi vjen si reagim ndaj ndërhyrjeve të policisë gjatë protestave të ditëve të fundit, të cilat janë shoqëruar me përplasje, përdorim të gazit lotsjellës, ujit me presion dhe plumbave të gomës.
Një nga rastet më të rënda është plagosja e 28-vjeçarit Erjon Vishkulli, i cili u godit në syrin e majtë nga një plumb gome gjatë protestës në kryeqytet. I riu rrezikon të humbasë shikimin dhe pritet të dërgohet në Itali për trajtim të specializuar mjekësor.
Ngjarja ka shkaktuar reagime të shumta, duke rikthyer në qendër të debatit publik mënyrën e ndërhyrjes së forcave të rendit ndaj protestuesve.
