Një zjarr i fuqishëm ka përfshirë bazën ushtarake Wainwright, në provincën Alberta të Kanadasë, duke shkaktuar vdekjen e të paktën katër ushtarakëve dhe plagosjen e rëndë të dhjetëra personave të tjerë. Kryeministri kanadez, Mark Carney, e ka cilësuar ngjarjen si një nga tragjeditë më të rënda që ka përjetuar ushtria kanadeze në kohë paqeje.
Ngjarja e rëndë ndodhi të shtunën, rreth orës 16:00 me orën lokale, kur një zjarr i përmasave të mëdha shpërtheu në territorin e bazës së Forcave të Armatosura Kanadeze në Wainwright.
Flakët u përhapën me shpejtësi, të favorizuara nga erërat e forta, duke krijuar një situatë jashtëzakonisht të rrezikshme për personelin ushtarak dhe ekipet e shpëtimit.
Sipas autoriteteve lokale, kushtet e vështira atmosferike ndikuan në përhapjen e menjëhershme të zjarrit, ndërsa zjarrfikësit ushtarakë dhe civilë punuan gjatë gjithë natës për të vënë situatën nën kontroll.
Kryeministri Mark Carney deklaroi se ekipet e emergjencës u përballën me kushte tepër të vështira, duke rrezikuar jetën e tyre për të shpëtuar personelin dhe për të parandaluar pasoja edhe më të rënda.
Dyshimet për shkakun e zjarrit
Shkaqet e zjarrit mbeten ende të paqarta dhe autoritetet kanadeze kanë nisur hetimet për të zbardhur rrethanat e ngjarjes.
Sipas raportimeve të mediave lokale, ekzistojnë dyshime se zjarri mund të ketë nisur pasi një tubacion kryesor gazi është goditur aksidentalisht gjatë një stërvitjeje ushtarake me municion luftarak.
Megjithatë, ky informacion nuk është konfirmuar zyrtarisht.
Ministria kanadeze e Mbrojtjes ka bërë të ditur se hetimet vazhdojnë dhe se, deri në këtë fazë, nuk ka asnjë tregues që ngjarja të ketë lidhje me ndonjë akt terrorist.
Ende nuk është sqaruar nëse viktimat dhe të plagosurit ndodheshin në poligonet ku zhvilloheshin stërvitjet apo nëse flakët janë përhapur edhe në ambientet e banimit të personelit ushtarak.
Katër viktima të konfirmuara, dhjetëra të plagosur rëndë
Kryeministri Carney konfirmoi të dielën vdekjen e katër pjesëtarëve të forcave të armatosura, ndërsa bëri të ditur se dhjetëra persona të tjerë kanë pësuar plagë të rënda.
Identitetet e viktimave nuk janë bërë ende publike, por familjarët e tyre janë njoftuar për humbjen e të afërmve.
Përpara deklaratës zyrtare të kryeministrit, disa media kanadeze kishin raportuar për shtatë viktima, duke iu referuar burimeve ushtarake të paidentifikuara. Megjithatë, bilanci zyrtar i konfirmuar mbetet katër të vdekur.
Autoritetet nuk kanë sqaruar nëse numri i viktimave mund të rritet, duke marrë parasysh gjendjen e rëndë të shumë prej të plagosurve.
Spitalet në gjendje emergjence, mobilizohen ambulanca dhe avionë
Përmasat e tragjedisë shkaktuan një mobilizim të madh të shërbimeve shëndetësore në provincën Alberta.
Spitali Royal Alexandra në Edmonton aktivizoi të shtunën në mbrëmje protokollin e emergjencës të njohur si “Kodi Portokalli”, i cili përdoret në rastet e fatkeqësive me një numër të madh viktimash dhe të plagosurish.
Sipas shërbimit shëndetësor të Albertës, operacioni i emergjencës zgjati rreth 10 orë dhe përfshiu 22 ambulanca dhe tetë mjete ajrore.
Një numër i madh ambulancash u panë duke mbërritur në spital, ndërsa një mjek i tha transmetuesit publik kanadez CBC se institucioni ishte përballur me një fluks jashtëzakonisht të madh pacientësh.
Protokolli i emergjencës u çaktivizua të dielën pasdite, por autoritetet shëndetësore paralajmëruan se trajtimi i të plagosurve do të kërkojë kujdes intensiv dhe të vazhdueshëm.
