Kongresmeni amerikan Ritchie Torres ka shprehur shqetësimin për dhunën ndaj protestuesve në Shqipëri, duke kërkuar respektimin e së drejtës për tubim paqësor dhe shtensionimin e situatës.
Në një reagim në rrjetet sociale, Torres i cilësoi të papranueshme veprimet e policisë ndaj protestuesve dhe bëri thirrje që dhuna të marrë fund.
“Jam thellësisht i shqetësuar nga shpërthimi i dhunës ndaj protestuesve në Shqipëri. Veprimet e ndërmarra nga Policia Shqiptare janë të papranueshme dhe duhet të marrin fund”, u shpreh ai.
Torres theksoi se qytetarët shqiptarë kanë të drejtë të protestojnë në mënyrë paqësore dhe se policia ka detyrimin ta respektojë këtë të drejtë, duke garantuar njëkohësisht shtetin e së drejtës.
“Situata duhet të shtensionohet për t’i dhënë fund dhunës alarmante”, shtoi kongresmeni amerikan.
Reagimi i tij vjen ndërsa protestat studentore vijojnë, me të rinjtë që kërkojnë dorëheqjen e kryeministrit Edi Rama. Pakënaqësitë për tarifat e studimit, cilësinë e mësimdhënies dhe kushtet në konvikte janë ndër çështjet që kanë shoqëruar lëvizjen studentore.
