Atë Mihal Sanellari ka reaguar ashpër pas ngjarjeve të mbrëmjes së djeshme në oborrin e Katedrales Orthodhokse në Tiranë, duke e cilësuar dhunën e ushtruar aty si çnjerëzore, barbare dhe të patolerueshme.
“Perëndia ju ndriçoftë mendjen!”, shkruan ai në Facebook, duke dënuar ashpër atë që ndodhi brenda oborrit të Kishës dhe duke theksuar se është tejkaluar çdo kufi, deri në mosrespektimin e shenjtërisë së objekteve të kultit, të cilat respektohen edhe në kohë lufte.
“Ajo që ndodhi sot brenda oborrit të Kishës Orthodhokse në Tiranë është tërësisht çnjerëzore, e dënueshme dhe ka tejkaluar çdo cak, duke mos respektuar asgjë, as shenjtërinë e objekteve të kultit, duke i përdhosur ato, objekte të cilat respektohen edhe në luftë”, shkruan Atë Mihal Sanellari.
Ai e përshkruan dhunën si një akt që ngjall dhimbje, dëshpërim dhe neveri, duke e mbyllur reagimin me fjalë të forta:
“Një dhunë në kufijtë e barbarisë, e patolerueshme për asnjë qenie njerëzore, që ushtrohet brenda oborrit të Kishës, e cila ngjall dhimbje, dëshpërim dhe neveri. E turpshme, shtazarake dhe e urryer. Kush mbjell dhunë, dhunë do të korrë.”
