Kisha Orthodhokse Autoqefale e Shqipërisë ka reaguar pas pamjeve të dhunës policore ndaj të rinjve në oborrin e Katedrales “Ngjallja e Krishtit” në Tiranë, gjatë ditës së shtatë të protestave.
Në pamjet e publikuara shihen efektivë policie që ndërhyjnë ndaj të rinjve në ambientet e jashtme të Katedrales. Pas ngjarjes, Kisha ka shprehur shqetësimin për përplasjet në një vend të shenjtë, duke kërkuar respektimin e hapësirave të kultit.
“Kisha Orthodhokse Autoqefale e Shqipërisë, pasi pa pamjet e ngjarjeve në oborrin e Katedrales ‘Ngjallja e Krishtit’ në Tiranë, shpreh shqetësimin dhe bën thirrje të respektohen vendet e saj të shenjta. Ato asnjëherë nuk janë hapësira konflikti e përplasjeje dhe nuk i pranojnë ato”, thuhet në reagimin zyrtar.
Kisha thekson se Katedralja është një vend lutjeje, ku kryhen shërbesat e shenjta dhe predikohet kultura e paqes.
Në përfundim të deklaratës, Kisha Orthodhokse u bën thirrje palëve të distancohen nga dhuna dhe të gjejnë hapësirën e dialogut.
Reagimi vjen pas një mbrëmjeje të tensionuar në kryeqytet, ku ndërhyrjet e policisë ndaj protestuesve janë shtrirë edhe pranë objekteve të kultit.
