Katër efektivë policie dhe shefi i Rendit të Komisariatit Nr. 1 janë pezulluar nga detyra pas ngjarjes së mbrëmshme, ku 19-vjeçari Ledion Balla nga Librazhdi përfundoi me këmbën e thyer gjatë protestës në Tiranë.
I riu ka deklaruar se nuk ishte protestues, por ndodhej pranë Ministrisë së Arsimit duke ndjekur ndeshjen. Sipas dëshmisë që u ka dhënë mjekëve, këmbën ia kanë thyer policët. Pamjet e tij teksa transportohej në krahë nga efektivët, pa barelë, shkaktuan reagime të forta.
Pas publikimit të videos, Drejtori i Përgjithshëm i Policisë urdhëroi pezullimin e katër efektivëve dhe shefit të Rendit, nënkomisar F. K. Agjencia e Mbikëqyrjes Policore dhe Prokuroria kanë nisur hetimet, ndërsa Policia e Shtetit ka hapur edhe një hetim disiplinor.
Shefi i Urgjencës së Traumës, Agustin Suma, konfirmoi se 19-vjeçari ka pësuar frakturë të kërcirit të djathtë dhe është shtruar në ortopedi, në gjendje të stabilizuar. Ai bëri të ditur se shtatë efektivë të tjerë morën ndihmë mjekësore dhe u larguan nga spitali, ndërsa nuk pati viktima apo pacientë të intubuar.
