FIFA ka ndëshkuar Federatën Spanjolle të Futbollit pas thirrjeve antiislame dhe ksenofobe të dëgjuara gjatë ndeshjes miqësore mes Spanjës dhe Egjiptit në muajin mars. Si pjesë e sanksioneve disiplinore, Spanja do të duhet ta zhvillojë ndeshjen e ardhshme miqësore ndërkombëtare me 15% të kapacitetit të stadiumit të mbyllur, ndërsa federata është gjobitur me 20 mijë dollarë.
Sipas BBC-së, incidenti ndodhi gjatë ndeshjes së zhvilluar në stadiumin RCDE, e cila përfundoi në barazim pa gola. Rreth minutës së dhjetë, një grup tifozësh spanjollë nisën të brohorisnin slogane antiislame, mes tyre “kush nuk kërcen është mysliman”. Thirrjet u përsëritën edhe në fillim të pjesës së dytë, pavarësisht mesazheve të shfaqura në ekranet e stadiumit dhe paralajmërimeve kundër sjelljes diskriminuese.
Pas ngjarjes, FIFA hapi procedura disiplinore ndaj Federatës Spanjolle të Futbollit, duke i cilësuar thirrjet si antiislame dhe ksenofobe. Federata spanjolle i dënoi publikisht incidentet, ndërsa trajneri Luis de la Fuente i cilësoi ato si “të patolerueshme”, duke theksuar se disa persona e përdorin futbollin për të krijuar hapësirë për sjellje të dhunshme.
Megjithatë, në mbrojtjen e paraqitur përpara komitetit disiplinor, federata argumentoi se brohoritjet nuk përbënin sjellje diskriminuese. FIFA e hodhi poshtë këtë pretendim, duke vënë në dukje se reagimi i vetë organizatorëve brenda stadiumit, përmes aktivizimit të procedurave kundër diskriminimit, binte ndesh me pretendimin se thirrjet ishin të padëmshme.
Sipas vendimit, 15% e vendeve të stadiumit ku Spanja do të zhvillojë miqësoren e ardhshme duhet të mbeten të mbyllura, kryesisht në sektorët pas portave. Megjithatë, me miratimin e FIFA-s, këto vende mund t'u caktohen grupeve të komunitetit ose kategorive të veçanta, si familjet, studentët dhe organizatat që luftojnë diskriminimin.
Sanksioni pritet të zbatohet gjatë miqësores së ardhshme ndërkombëtare të Spanjës, me muajin qershor si një nga mundësitë e përmendura. Nëse kalendari i Ligës së Kombeve e shtyn zbatimin e masës, ajo mund të aplikohet gjatë një prej dritareve të ndeshjeve kualifikuese për Kampionatin Evropian 2028.
Edhe Federata Egjiptiane e Futbollit dënoi incidentin, duke i cilësuar thirrjet si një akt racist të papranueshëm. Megjithatë, ajo theksoi se sjellja e një grupi të kufizuar tifozësh nuk do të ndikonte në marrëdhëniet mes dy federatave.
