Gjykata e Elbasanit ka caktuar masën e sigurisë “arrest në burg” për Poli Boriçin, i dyshuar për tentativën e vrasjes së një shtetasi me armë zjarri, pas një konflikti të ndodhur në ambientet e një lokali në Elbasan.
Seanca për vlerësimin e masës së sigurisë u zhvillua mesditën e 18 gushtit, ndërsa Boriçi u paraqit para gjykatës, i shoqëruar nga avokati i tij.
Sipas akuzës, konflikti mes personave ka përshkallëzuar dhe Boriçi dyshohet se ka përdorur armë zjarri. Pas ngjarjes, ai u ndalua nga Policia dhe tashmë do të qëndrojë në paraburgim gjatë vijimit të hetimeve.
Në seancë, Boriçi ka deklaruar se nuk kishte qëllim ta vriste personin, por vetëm ta frikësonte, pasi, sipas tij, ndihej i kërcënuar prej tij.
Gjykata ka shqyrtuar materialet e administruara deri në këtë fazë, ndërsa Prokuroria ka kërkuar një masë sigurie për garantimin e vijimit të hetimeve.
Ndërkohë, autoritetet vijojnë hetimet për zbardhjen e plotë të dinamikës së konfliktit, ndërsa pritet të analizohen dëshmitë e personave të pranishëm në lokal dhe provat e tjera të administruara.
