Edi Rama ka folur sot për të disatën herë për arrestimin e Erion Veliajt dhe, për të disatën herë, ka sulmuar SPAK dhe prokurorët e posaçëm.
“Ka një hetim për jetën e kryetarit të bashkisë. Se sa kjo është në shinat e Kushtetutës nuk e di me siguri, por mendoj se është jashtë shinave të institucioneve të drejtësisë,” – tha Rama para të ftuarve që nuk e fshihnin pikëllimin për atë që i ka ndodhur Erion Veliajt.
“Vetëm një i çmendur mund të na thotë se ne drejtojmë drejtësinë. Por, të bindur që kjo është rruga e duhur dhe që të gjithë duhet të jenë të barabartë përpara ligjit, sot konstatojmë se jemi në një sfidë të re,” – tha kryeministri, sipas të cilit pavarësia e arritur e sistemit të drejtësisë duhet të garantohet dhe të mbështetet nga profesionalizmi dhe standardet demokratike, përfshirë të drejtat dhe liritë e njeriut.
Megjithatë, kryeministri nuk fshehu frikën se Shqipëria mund të kthehet në një “republikë prokurorësh.” “Nuk na takon neve të themi nëse Erjoni është fajtor apo i pafajshëm, por duhet të kërkojmë të drejta dhe transparencë,” – tha Edi Rama, i cili mori përsipër edhe rolin e gjykatësit kur shtoi:”Nëse Erion Veliaj dhe e shoqja kanë blerë bizhuteri me vlerë 800 mijë euro, nuk kemi ç’të diskutojmë. Por ne kemi të drejtën të kërkojmë prova.”
Se pse duhet të gjykojë Rama provat, kur këtë e bën gjykata, kjo mbetet për t’u parë në ditët në vazhdim, për të cilat kryeministri deklaroi se do t’i ndjekë zhvillimet me shumë kujdes.
