Një email i dërguar nga Viola Haxhiademi drejt motrës së saj, D. Haxhiademi, është një nga elementët që ka çuar SPAK-un drejt hetimeve për vilën luksoze që sipas prokurorëve zotërohej në mënyrë të tërthortë nga ish-zv.kryeministrja Belinda Balluku në kompleksin White Rocks në Dhërmi.
Sipas dosjes hetimore, Viola Haxhiademi, me detyrën e drejtoreshës së Departamentit Administrativ në “Albcontrol” sh.a, komunikon me motrën e saj dhe e informon se Belinda Balluku disponon një njësi banimi në kompleksin White Rocks.
“Nga kqyrja e aktit të ekspertimit nr.203, datë 08.10.2024, ku është ekspertuar aparati celular i tipit iPhone i Viola Haxhiademit, rezulton se në datën 13 shkurt 2018, në orën 20:27, nga adresa e postës elektronike të Viola Haxhiademit dërgohet email në drejtim të postës elektronike të motrës së saj. Emaili ka përmbajtjen: ‘Zemër, po të dërgoj fotot e Belës që të kuptosh çfarë është shtëpia. Të kam dërguar dhe planin e projektit për të parë për cilën bëhet fjalë. Bela ka F5 ndërsa ne kemi F6. Po të shikosh foton që kam bërë nga afër me vilat, kam vizatuar dhe ku do bëhet pishina. Më pëlqen shumë’”, citohet në dosjen e SPAK-ut.
Sipas prokurorëve, ky komunikim mes motrave lidhet me dy njësi banimi në kompleksin White Rocks, në zonën e Drimadhës, Gjilek, Dhërmi, të ndërtuara nga shoqëria “Eurocol”, kompani e cila sipas hetimeve kishte fituar tenderë pranë Albcontrol në periudhën kur institucioni drejtohej nga Belinda Balluku.
SPAK thotë se ky email ka mjaftuar për të nisur verifikimet, nga të cilat ka rezultuar, sipas konkluzioneve të dosjes, se vila është në pronësi të tërthortë të Ballukut dhe familjarëve të saj.
Sipas hetimeve, Balluku e ka përdorur vilën nga qershori i vitit 2019 dhe në vijim. Gjatë kontrollit të ushtruar me vendim të Gjykatës së Posaçme, hetuesit kanë konstatuar se ambienti përdorej rregullisht nga ish-zv.kryeministrja, ndërsa arredimi dhe pajisjet elektronike ishin vendosur prej saj.
Në vilë janë gjetur piktura të vendosura në mure me inicialet e vajzës së Ballukut, zbukurime për festa ditëlindjeje me emrin e djalit të saj, ndërsa në televizorin e dhomës së ndenjjes është konstatuar i hapur Netflix me adresën elektronike të llogarisë së Ballukut, ku si përdorues figuronin vetë ish-ministrja dhe fëmijët e saj.
(Vijon)
