Vendimi i Këshillit Bashkiak të Durrësit për të rritur pagat e Kryetares së Bashkisë dhe administratës ka shkaktuar polemika dhe pakënaqësi.
Sipas këtij vendimi, Kryetarja Emiriana Sako rriti pagën e saj me 56,7%, duke e çuar nga 1.850.000 lekë në 2.900.000 lekë të vjetra në muaj. Po ashtu, tre zëvendëskryetarët Renis Mullaj, Elio Jani dhe Gentian Kallmi përfituan një rritje prej 40,6%, duke kaluar nga 1.600.000 lekë në 2.250.000 lekë të vjetra. Sekretari i përgjithshëm i bashkisë përfitoi një rritje page prej 55,6%.
Paga mujore e këshilltarëve bashkiakë u rrit gjithashtu me 56,7%, duke kaluar nga 185.000 lekë në 290.000 lekë të vjetra. Drejtorët e drejtorive patën një rritje prej 55%, ndërsa rritja më e madhe e përfituar ishte për drejtuesen e kabinetit me 86,7%, si dhe për këshilltarin e kryetares dhe zëdhënësin e institucionit me një rritje prej 90,8%, duke e barazuar pagën e tyre me atë të drejtorëve të drejtorive. Ndërkohë, rritjet për nivelet e tjera administrative variojnë, por janë më të ulëta. Për specialistët e bashkisë, rritja e pagës ishte 14,3%.
Këto rritje kanë nxjerrë në pah kontrastin mes pagave të të zgjedhurve dhe funksionarëve të lartë në krahasim me punonjësit e shërbimeve bazë, duke shkaktuar debat mbi prioritetet e vendimmarrjes, sidomos në kohë krizash si ajo e mbetjeve toksike në port. Këshilltarët e opozitës a kanë kundërshtuar këtë vendim.
