Protesta kundër qeverisë dhe establishmentit politik hyri sot në ditën e saj të 14-të, ndërsa qytetarët sollën një tjetër formë simbolike të kundërshtimit në shesh. Mes pankartave dhe thirrjeve të zakonshme, vëmendjen e tërhoqi një “kupon tatimor” gjigant, ku ishin renditur disa nga çështjet më të debatuara të viteve të fundit dhe kostot e tyre të pretenduara për buxhetin e shtetit.
Në poster përfshiheshin inceneratorët, sterilizimi, check-up-i, arbitrazhet ndërkombëtare, PPP-të, tenderat e infrastrukturës, Durrës Marina dhe projekte të tjera, të shoqëruara me shifra që sipas autorëve të tij përfaqësojnë faturën e rëndë të korrupsionit dhe keqmenaxhimit.
Me një format që imitonte një faturë të zakonshme fiskale, por me një total prej mbi 5.5 miliardë eurosh, posteri u veçua si një nga elementët më origjinalë të protestës së kësaj mbrëmjeje, duke sintetizuar në një imazh të vetëm shumë prej akuzave që prej ditësh artikulohen nga protestuesit kundër qeverisë.
