Kreu i Lëvizjes Bashkë, Arlind Qori, së bashku me deputetin Redi Muçiu, iu bashkuan protestës kundër ndërtimit të resortit luksoz në Rrjoll. Në një prononcim për mediat, Qori deklaroi se rrethimi i kantierit me tela me gjemba është i paligjshëm, pasi pengon kalimin e lirë të qytetarëve drejt detit dhe cenon një hapësirë publike.
Sipas tij, projekti është ngritur mbi atë që ai e cilësoi si grabitje të pronave të banorëve të zonës. Qori tha se pronarët legjitimë të tokave janë lënë mënjanë, ndërsa përfitues kanë qenë interesa të fuqishme ekonomike. Ai ngriti gjithashtu shqetësimin për ndërhyrjen në një zonë të mbrojtur, duke vënë në pikëpyetje ligjshmërinë e ndërtimit.
“Si mund të rrethosh me tela me gjemba kalimin e qytetarëve në det? Kjo është e paligjshme dhe është mbështetur mbi vjedhjen e pronave të qindra qytetarëve. Pronarët me letra janë një e dy, ndërsa të shpronësuarit nga oligarkët janë me qindra. Këtu janë zona të mbrojtura, si mund të ndërtohet në këtë mënyrë? Përparësinë e kanë ata, ne jemi solidarë me ta”, u shpreh Qori.
