Departamenti Amerikan i Shtetit ka reaguar pas deklaratës së ministres serbe Snezhana Paunoviç, e cila tha se, po të ishte në vend të ish-presidentit jugosllav Sllobodan Millosheviç në vitin 1998, do ta kishte “spastruar etnikisht Kosovën”.
Në një përgjigje për Gazetën Express, një zëdhënës i Departamentit Amerikan të Shtetit theksoi se prioriteti i Shteteve të Bashkuara në Ballkanin Perëndimor mbetet ruajtja e paqes dhe stabilitetit, ndërsa normalizimi i marrëdhënieve mes Kosovës dhe Serbisë është një element kyç për arritjen e këtij objektivi.
“Prioriteti i SHBA-së në Ballkanin Perëndimor është paqja dhe stabiliteti. Normalizimi i marrëdhënieve midis Serbisë dhe Kosovës është një pjesë e domosdoshme e kësaj. Ne i inkurajojmë udhëheqësit politikë të përdorin gjuhë konstruktive për të çuar përpara këtë qëllim me mirëbesim”, deklaroi zëdhënësi i DASH.
Deklarata e Paunoviçit shkaktoi reagime të forta në Kosovë, pasi ajo iu referua luftës së viteve 1998-1999 dhe ish-presidentit Sllobodan Millosheviç, i cili konsiderohet përgjegjës për politikat represive ndaj shqiptarëve të Kosovës.
Pas kësaj deklarate, autoritetet e Kosovës shpallën Paunoviçin persona non grata, duke i ndaluar hyrjen dhe tranzitin në territorin e Republikës së Kosovës.
