Kryetari i Lidhjes Demokratike të Kosovës, Lumir Abdixhiku, ka reaguar pas dorëzimit të 148 nënshkrimeve të delegatëve të partisë, të cilët kanë kërkuar thirrjen e Kuvendit të jashtëzakonshëm të LDK-së dhe shkarkimin e tij nga pozita e kryetarit.
Përmes një reagimi publik, Abdixhiku bëri të ditur se, në përputhje me statutin e LDK-së dhe vullnetin e një të tretës së delegatëve, ka autorizuar sekretarin e përgjithshëm të partisë që të nisë menjëherë procedurat për organizimin e Kuvendit të jashtëzakonshëm.
Ai theksoi se nuk do t’i shmanget asnjë procesi demokratik brenda partisë dhe se vendimi për të ardhmen e tij politike duhet të merret përmes mekanizmave të LDK-së.
“LDK ka qenë dhe duhet të mbetet shtëpi e demokracisë. Nuk do t’i shmangem asnjë procesi demokratik, nuk do t’i iki asnjë vote dhe nuk do ta mbaj asnjë detyrë kundër vullnetit të shumicës”, deklaroi Abdixhiku.
Kreu i LDK-së njoftoi gjithashtu se do të ndërpresë angazhimet në negociatat për formimin e institucioneve të reja të Kosovës, pasi sipas tij nuk është serioze të vazhdojë bisedimet në emër të partisë, ndërkohë që mandati i tij për ta përfaqësuar LDK-në është vënë në diskutim.
“Kjo nismë vjen në një moment shumë kritik për ne si parti dhe për vendin. Vjen gjatë bisedimeve për formimin e institucioneve, kur nuk do të duhej të kishim as kohë e as energji për interesa të tjera, përveç krijimit të institucioneve të shtetit”, u shpreh Abdixhiku.
Vendimi i tij për të pezulluar përfshirjen në negociata vjen në një periudhë kur partitë politike në Kosovë po zhvillojnë diskutime për krijimin e institucioneve të reja.
