Këshilli i Bashkimit Evropian ka emëruar Antero Alfarela Oliveira Lopes në postin e Shefit të Misionit të BE-së për Sundimin e Ligjit në Kosovë (EULEX), me një mandat fillestar prej 10 muajsh, që nis më 10 gusht 2026.
Lopes do të pasojë në këtë detyrë Giovanni Pietro Barbanon, i cili ka drejtuar deri tani misionin e EULEX-it në Kosovë.
Zyrtari portugez ka një karrierë mbi katër dekada në fushën e diplomacisë, sundimit të ligjit dhe qeverisjes së sektorit të sigurisë, përfshirë më shumë se 25 vite angazhime në kuadër të Organizatës së Kombeve të Bashkuara.
Gjatë karrierës së tij, Lopes ka shërbyer edhe në misionet paqeruajtëse të OKB-së në Kroaci dhe Bosnje-Hercegovinë (UNPROFOR), si dhe për gjashtë vite në Misionin e Administratës së Përkohshme të OKB-së në Kosovë (UNMIK).
Përvoja e tij përfshin udhëheqje strategjike, menaxhim krizash dhe bashkëpunim me institucione vendore dhe partnerë ndërkombëtarë.
EULEX Kosova, i themeluar në vitin 2008, është misioni më i madh civil në kuadër të Politikës së Përbashkët të Sigurisë dhe Mbrojtjes të Bashkimit Evropian. Misioni ka për qëllim të mbështesë institucionet e sundimit të ligjit në Kosovë në forcimin e efektivitetit, pavarësisë, transparencës dhe respektimit të standardeve ndërkombëtare.
EULEX vijon gjithashtu të ofrojë mbështetje për Dhomat e Specializuara dhe Zyrën e Prokurorit të Specializuar, si dhe të kontribuojë në zbatimin e marrëveshjeve të arritura në kuadër të dialogut të lehtësuar nga BE-ja.
Mandati aktual i misionit është zgjatur nga Këshilli i BE-së në qershor 2025 për një periudhë dyvjeçare, deri më 14 qershor 2027.
