“Nuk jam zëdhënës i kompanisë në fjalë” – kështu u përgjigj sot Sali Berisha kur u pyet për ndryshimin e argumentit nga kompania lobuese Continental Strategy në letrën drejtuar senatorit amerikan Mario Rubio. Fillimisht, kompania kishte deklaruar se Berisha nuk ishte aktiv në politikë, por më pas ndryshoi qëndrim duke thënë se ai është aktiv politikisht, por jo pjesë e qeverisë.
Kreu i Partisë Demokratike nuk dha as përgjigje për pyetjen se sa është shpenzuar për këtë lobim, duke deklaruar se “unë vetë nuk kam shpenzuar asnjë qindarkë”.
Në vijim të konferencës për shtyp, Berisha e quajti “narko-turizëm” modelin me të cilin, sipas tij, po zhvillohet turizmi në Shqipëri. Ai akuzoi qeverinë se po përdor para të pista, të cilat po dëmtojnë rëndë industrinë turistike. Sipas tij, nën parrullën e “turizmit elitar”, Shqipëria ofron pjata që shkojnë deri në 200 euro dhe çadra me çmime katastrofike, ndërkohë që ndërtimet e resorteve milionëshe në bregdet kanë degraduar turizmin vendas.
Edhe pse nuk përmendi asnjë emër konkret ndërtuesi, Berisha i quajti ata shkatërrues të turizmit dhe kritikoi mediat pranë qeverisë që, sipas tij, “promovojnë kaltërsitë e jugut” por nuk tregojnë të vërtetën e dhimbshme që po përjeton turizmi shqiptar.
