SPAK njoftoi sot se ka përfunduar hetimet ndaj pesë personave të akuzuar për blerje votash në zgjedhjet vendore të vitit 2023. Ndër ta është edhe ish-kandidati i Partisë Demokratike për kryetar Bashkie në Rrogozhinë, Shkëlqim Hoxha.
Sipas njoftimit zyrtar, Hoxha akuzohet për veprën penale të “Moskallëzimit të krimit”, pasi ka qenë në dijeni të veprimeve të paligjshme, por nuk i ka referuar ato pranë organeve kompetente, në kundërshtim me nenin 300 të Kodit Penal.
Hetimet tregojnë se të dyshuarit, në bashkëpunim me njëri-tjetrin, kanë siguruar dhe shpërndarë bileta udhëtimi të parapaguara për persona të ndryshëm, një praktikë e dokumentuar në 64 raste, me qëllim ndikimin në votë në favor të kandidatit Shkëlqim Hoxha.
Ky rast nxjerr në pah një paradoks që ndjek Partinë Demokratike dhe kandidatët e saj: në një kohë kur kryetari i PD-së del përditë në konferenca për të denoncuar “krimin elektoral të shtetit të Edi Ramës”, rezulton se të njëjtat mëkate e ndjekin edhe vetë partinë që ai drejton. Nuk bëhet fjalë që Rama është më i mirë, por për faktin se integriteti i një partie apo kandidatëve që nxjerr në zgjedhje është thelbësor kur denoncon paligjshmëritë e të tjerëve. Pasi në të kundërt, mjafton një rast si ky i hetimit të SPAK për të minuar besueshmërinë e qytetarëve ndaj çdo denoncimi tjetër publik.
