Faqja në Facebook “Dukagjin Deli Zot Vetit”, e përfaqësuesve të banorëve të Dukagjinit dhe organizatorë të dy protestave për rrugën e tyre, ka dalë me një reagim, duke përgënjeshtruar postimin e djeshëm të kryeministrit Edi Rama dhe kryetarit të Bashkisë Shkodër, Benet Beci.
Ndryshe nga ccfarw thotw kryeministri dhe kryebashkiaku, ku pretendojnë për avancimin e punimeve në rrugën Prekal-Lotaj-Ndërlysaj, banorët theksojnw se segmenti vijon të jetë i ngushtë, i papërfunduar dhe jashtë standardeve. Sipas tyre, rruga është pa mure pritse, pa ura, pa kanale kulluese dhe i rrezikshëm për përdoruesit e tij.
“Dukagjin Deli Zot Vetit ju bën me dije se postimi i ditës së djeshme, i shpërndarë nga Edi Rama dhe Benet Beci, është totalisht një mashtrim. Ne jemi banorë të Dukagjinit dhe e dimë se ku është punuar dhe sa është punuar në rrugën e shumëpërfolur të Dukagjinit. Aksi Prekal-Kirë vazhdon të jetë ashtu si para 80 vitesh: i ngushtë, pa mure pritse, pa mure mbrojtëse, pa ura dhe pa kanale kulluese. Ky segment ka filluar në vitin 2023 dhe vazhdon të jetë i papërfunduar dhe shumë i rrezikshëm për banorët, si dhe për qindra turistë që kalojnë çdo ditë.
Ne, si faqe dhe si organizatorë të dy protestave të mëdha “Dukagjini kërkon rrugën”, denojmë dhe e cilësojmë si të turpshëm dhe tallës veprimin e djeshëm të kryeministrit, si dhe të kryetarit të Bashkisë Shkodër. Publikisht i bëjmë thirrje Benet Becit të heqë dorë nga këto lloj veprimesh skandaloze që ndikojnë në provokimin dhe talljen me komunitetin e Dukagjinit. Nëse rruga e Dukagjinit nuk fillon të ndërtohet seriozisht dhe me parametrat e duhur, atëherë ne do të marrim masat tona” – shprehen ata.
Banorët paralajmëron se nëse nuk nis ndërtimi serioz dhe me parametrat e duhur, komuniteti i Dukagjinit do të marrë masa për të mbrojtur interesat e tij.
