Banorët e Krujës dhe Fushë Krujës kanë dalë sërish në protestë ditën e sotme, ku kërkojnë hyrje-dalje në autostradën Thumanë-Kashar. Ata janë përplasur me forcat e policisë në momentin që kanë tentuar të bllokojnë qarkullimin rrugor.
Protestuesit kanë bllokuar sërish autostradën Thumanë-Kashar, duke kërkuar reagimin e autoriteteve shtetërore përgjegjëse për këtë hall që ka prekur mbi 85 mijë banorë të zonës, si dhe më shumë se 2 mijë biznese.
Ata fajësojnë zëvendëskryeministren dhe ministren e Infrastrukturës, Belinda Balluku që e la koncensionarin të izolonte këto zona me rrugën që ndërtoi. Për këtë ata kanë dorëzuar edhe një kallëzim penal në SPAK ndaj Ballukut, ARRSH-së dhe institucionet e tjera përgjegjëse për ndërtimin e kësaj autostrade.
Kjo është protesta e njëmbëdhjetë e banorëve, ndërsa janë të vendosur në kërkesën e tyre.
Rruga Thumanë – Kashar është ndërtuar tërësisht me fondet e kompanisë private Gener 2. Edhe pse i kanë dalë disa herë në krah protestës se banorëve, asnjë nga drejtuesit apo deputetët e PD nuk e përmend emrin e kësaj kompanie me pronar Bashkim Ulaj.
Pagesa për këtë rrugë është 270 lek të reja. Edhe pse pretendohet se është totalisht investim privat, kompania Gener 2 kompensohet nga shteti shqiptar nëse në rrugën Thumanë – Kashar nuk kalojnë 28 mijë mjete në ditë. Kompensimi kap shifrën e 8 milionë eurove.
