Banorët e Krujës dhe Fushë Krujës zhvilluan protestën e dhjetë radhasi në auostradën Thumanë-Kashar. Ata bllokuan sërish aksin nga të dyja anët dhe kërkuan që kërkesa e tyre për akses në këtë rrugë të merret parasysh nga qeveria dhe koncensionari, pasi bizneset po falimentojnë.
Ditën e sotme protestuesit kanë njoftuar edhe kallëzimin penal që do të dorëzojnë në SPAK dhe në Gjykatën Kushtetuese çështjen e mungesës së aksesit në autostradë.
Rruga Thumanë – Kashar është ndërtuar tërësisht me fondet e kompanisë private Gener 2. Edhe pse i kanë dalë disa herë në krah protestës se banorëve, asnjë nga drejtuesit apo deputetët e PD nuk e përmend emrin e kësaj kompanie me pronar Bashkim Ulaj.
Pagesa për këtë rrugë është 270 lek të reja. Edhe pse pretendohet se është totalisht investim privat, kompania Gener 2 kompensohet nga shteti shqiptar nëse në rrugën Thumanë – Kashar nuk kalojnë 28 mijë mjete në ditë. Kompensimi kap shifrën e 8 milionë eurove.
