Avokati i Popullit inspektoi ambientet e burgut të Pojskës, ku po mbahet një 34-vjeçare së bashku me foshnjën e saj 7-muajshe, pasi u arrestua në Aeroportin e Rinasit në zbatim të një vendimi të formës së prerë për dhunë në familje.
Ai tha se institucioni ka nisur verifikimet menjëherë pasi është njohur me rastin dhe dyshon për shkelje procedurale, duke theksuar se mbajtja e një nëne me fëmijë në gji për 72 orë në Bllokun e Sigurisë ka qenë e panevojshme. Sipas tij, janë inspektuar edhe kushtet ku po qëndrojnë nëna dhe foshnja, ndërsa janë njoftuar institucionet përgjegjëse dhe i është drejtuar një kërkesë gjykatës.
Avokati i Popullit u shpreh se 34-vjeçarja duhet të lirohet gjatë ditës së nesërme, ndërsa paralajmëroi se, nëse kjo nuk ndodh, do të ketë shkelje të procedurave ligjore.
34-vjeçarja, nënë e tre fëmijëve të mitur, u arrestua sapo mbërriti në Rinas dhe u transferua në burgun e Pojskës, pasi ishte dënuar për dhunë në familje, pas kallëzimit të bërë nga vjehrri i saj. Ndërkohë, janë publikuar edhe pamje nga dhoma ku ajo po qëndron së bashku me foshnjën e saj, rast që ka ngjallur reagime në opinionin publik.
