Gjendet dhe sekuestrohet celular në qelinë e Laert Haxhisë, i dënuar me burgim të përjetshëm për atë që njihet si masakra e Lushnjës, ndërsa po gjykohet në Gjykatën e Posaçme si kreu i një grupi kriminal që urdhëronte vrasje dhe krime të tjera të rënda.
Celulari pritet të dërgohet në laboratorin e SPAK për t’u hapur dhe për të parë nëse nga brenda qelisë, Haxhiu, që konsiderohet me rrezikshmëri të lartë, është përfshirë në veprimtari kriminale.
Kontrollet në burgun e sigurisë së lartë në Drenovë, ku ndodhet edhe Haxhiu, u kryen ditën e sotme nga forcat speciale.
Laert Haxhia kohët e fundit ka qenë disa herë në fokus të kontrolleve në burg, që pas skandalit që u zbulua kur një influencuese nga Kosova ishte takuar me të në qeli.
Kohët e fundit, drejtuesit e burgjeve në vend, sidomos atyre të sigurisë së lartë, janë akuzuar se kanë lejuar vajza të showbiz-it të takohen, në kundërshtim me ligjin dhe rregulloren, me bosët e arrestuar të krimit.
