Me kërkesë të SPAK, Gjykata e Posaçme sekuestroi pasuritë e Hajdar Lalës, alias Xaka alias Sefa, Islam Sefës, alias Xaka, dhe Vidjan Barokës, si dhe të personave të lidhur me ta, pasi dyshohet se këto pasuri rrjedhin nga paratë e siguruara nga trafiku i drogës. Vendimi është marrë nga gjyqtarja e Posaçme, Etleva Deda.
Në listën e pasurive të sekuestruara janë ullishte, apartamente, sipërfaqe toke, kompani tregtare etj.
Islam Sefa u arrestua në korrik të vitit 2024 pranë SPAK, pasi akuzohej si drejtues i një grupi kriminal të trafikut të drogës në Gjermani, me një vlerë prej 3.3 milionë eurosh. SPAK, përmes një njoftimi për shtyp, bëri të ditur se nga hetimet janë identifikuar 12 anëtarë të grupit, 8 shtetas shqiptarë dhe 4 shtetas gjermanë.
Sipas SPAK, grupi kriminal, gjatë viteve 2020-2021, ka importuar në Republikën Federale të Gjermanisë, në disa episode, sasi të konsiderueshme lënde narkotike të llojit marijuanë. Sasia e lëndës narkotike sigurohej kryesisht nga Shqipëria dhe Spanja, e cila, pasi futej në territorin gjerman, tregtohej në rajonin e Wolfsburgut, Magdeburgut, si dhe në vende të tjera të Bashkimit Evropian.
"Gjatë hetimeve janë evidentuar 9 (nëntë) episode dhe është provuar se sasia e lëndës narkotike të trafikuar është 912 kg marijuanë, ndërsa vlera e lëndës narkotike të trafikuar kap vlerën prej 3.374.400 (tre milionë e treqind e shtatëdhjetë mijë e katërqind) euro", njoftoi SPAK.
