Dy persona janë arrestuar në Tiranë pasi ishin shpallur në kërkim për përndjekje në rrjete sociale. Policia bën me dije se njëri prej tyre ka kërcënuar familjarët e ish të dashurës, duke lënë dy fishekë pranë banesës së tyre.
Në pranga kanë rënë K. M., 34 vjeç, i kërkuar për “Përndjekje” dhe “Falsifikim kompjuterik”. Ai dyshohet se ka përndjekur ish të dashurën në rrjete sociale dhe ka vendosur dy fishekë arme gjahu në oborrin e familjes së saj si kërcënim.
Gjithashtu është arrestuar edhe E. P., 28 vjeç, i cili kishte masë sigurie “Arrest në burg” nga Gjykata e Tiranës për “Përndjekje”, pasi akuzohet se ka përndjekur ish të dashurën në rrjete sociale.
Policia njoftoi se materialet iu referuan Prokurorisë së Tiranës për veprime të mëtejshme.
