Në kuadër të hetimit për zjarrin në landfillin e mbetjeve në Elbasan, policia ushtroi kontrolle mëngjesin e sotëm në 14 banesa të administratorëve të kompanisë Eco Elb dhe 8 mbikëqyrësve të caktuar nga bashkitë e Qarkut për monitorimin e kontratës.
Në shtëpinë e Denis Hasallës, vëllai i deputetit socialist Saimir Hasalla, u gjet një sasi fishekësh, ndërsa në banesën e Bledar Çullhajt një pistoletë pa leje. Të dy u arrestuan me urdhër të prokurorit.
“Strukturat për Hetimin e Krimeve të Drejtorisë Vendore të Policisë Elbasan ekzekutuan vendimin e Gjykatës së Shkallës së Parë të Juridiksionit të Përgjithshëm Elbasan, për lejimin e kontrollit në disa banesa, në kuadër të një procedimi penal të vitit 2024. Në vijim të veprimeve u bë arrestimi i shtetasve:
B. Ç., 36 vjeç, pasi gjatë kontrollit në banesën e tij u gjet një armë e ftohtë;
D. H., 35 vjeç, pasi gjatë kontrollit në banesën e tij u gjet një sasi municioni luftarak”, njoftoi policia.
Djegia e fushës së mbetjeve tek inceneratori i Elbasanit është ndër krimet më të rënda mjedisore. Prokuroria ka nisur hetimet për zjarrvënie, ndotje të ajrit dhe shpërdorim të detyrës.
